ಕಟ್ಟಿಗೆ ಒಡೆಯುವವರು ನಿಮ್ಮ ಮನೆಗೆ ಬಂದಿದ್ದಾರಾ?

ಹಳ್ಳಿ ಬದುಕಿನಲ್ಲಿ ಏನೋ  ಒಂದು ವಿಶೇಷ ವಿದೆ . ಜನರ ಆಲೋಚನೆ ,ಕೆಲಸ ತಿಂಡಿ ತಿನಸು , ಕಾರ್ಯಕ್ರಮಗಳು ಹೀಗೆ ಪಟ್ಟಿ ಬೆಳೆಯುತ್ತಾ  ಹೋಗುತ್ತದೆ . ಗ್ರಾಮೀಣ ಭಾಗದಲ್ಲಿ ಅಡುಗೆ ಮಾಡಲು ಕೆಲವರು ಗ್ಯಾಸ್ ಬಳಕೆ ಮಾಡಿದರೆ ಹೆಚ್ಚಿನವರು ಕಟ್ಟಿಗೆಯನ್ನೇ ಬಳಸುತ್ತಾರೆ . ಮಳೆಗಾಲದ ತಯಾರಿಗಾಗಿ  ಕಟ್ಟಿಗೆ ಸಂಗ್ರಹಿಸುವ ಕೆಲಸವಂತೂ ಭರ್ಜರಿಯಾಗಿ ನಡೆಯುತ್ತದೆ . ಗರಗಸ ಅಥವಾ ಇತರ ತಂತ್ರಗಳನ್ನು  ಬಳಸಿ ಕಟ್ಟಿಗೆಯನ್ನು ಸಿದ್ದಗೊಳಿಸುತ್ತಾರೆ . ಆದರೆ  ಕಟ್ಟಿಗೆಯನ್ನು ಭಾಗ ಮಾಡುವವರು  ಅಥವಾ ಸೀಳುವವರು ಬೇಕಲ್ವೆ?

ಹಿಂದೆ ಕಟ್ಟಿಗೆ ಭಾಗ ಮಾಡುವ ಓರ್ವ ಶ್ರಮ ಜೀವಿಗೆ ಒಳ್ಳೆಯ ಬೇಡಿಕೆ ಇತ್ತು ,ಗ್ಯಾಸಿನ ಹಾವಳಿಯಿಂದ ಈಗೀಗ ಅಷ್ಟೇನೂ  ಕೆಲಸಗಳು ಸಿಗುತ್ತಿಲ್ಲ . ಮರದ ದಿಮ್ಮಿಯನ್ನು ಸರಿಯಾಗಿ ಇಟ್ಟು ಭಾಗ ಮಾಡಬೇಕಾಗುತ್ತದೆ . ಅದಕ್ಕೆ ಪಳಗಿದ ,ನುರಿತ ಅನುಭವಿಗಳೇ  ಬೇಕು !. ಕಟ್ಟಿಗೆಯನ್ನು ಬೇಕಾದ ರೀತಿಯಲ್ಲಿ ತುಂಡು ಮಾಡುವ ಕಾಯಕ ಸುಲಭವಲ್ಲ . ಅದಕ್ಕೆ ಗಟ್ಟಿಮುಟ್ಟಾದ ಶರಿರವೂ ಬೇಕು . ಸಾಮಾನ್ಯವಾಗಿ ಈಗ ಕಟ್ಟಿಗೆ ಸಿಳುವ ಅನುಭವಿಗೆ ಈಗ 500-600ರೂಪಾಯಿಗಿಂತಲೂ ಹೆಚ್ಚಿದೆ .ನಾನು ಸಣ್ಣ ಪ್ರಾಯದಲ್ಲಿ ಕಟ್ಟಿಗೆ ಕಡಿಯಲೆಂದು ಪಕ್ಕದ ಮನೆಯ ಅನುಭವಿ ಕೆಲಸದವರೊಂದಿಗೆ ಹೋಗಿದ್ದೆ . ನಾನು ಮಾತ್ರ ನಿಮಿಷಕೊಮ್ಮೆ ನೀರು ಕುಡಿಯುತ್ತಿದ್ದೆ ! ಕಟ್ಟಿಗೆಗೆ ಕೊಡಲಿಯ ಏಟು ಸರಿಯಾಗಿ ಸಿಗದೆ ಒಮ್ಮೆ ಅತ್ತ ಮತ್ತೊಮ್ಮೆ ಇತ್ತ ಹೋಗುತ್ತಿತ್ತು . ಕೊನೆಗೆ ಮೊದಲು ಕೊಡಲಿ ಹಿಡಿಯುವುದನ್ನು ಆ ಅನುಭವಿ ಹೇಳಿಕೊಟ್ಟರು . ಆಗಲೇ  ಗೊತ್ತಾಗಿದ್ದು ನನಗೆ ಕೊಡಲಿ ಹಿಡಿಯುವುದೂ  ಒಂದು ಕಲೆ ಎಂದು ! ಹೇಗೊ ಸಂಜೆಯಾಯಿತು ಕೈತುಂಬ  ಉಹಿಸಲಾಗದಷ್ಟೂ ಸಂಬಳವೂ  ಸಿಕ್ಕಿತು . ಮರುದಿನ ಮೈ ಕೈ ತುಂಬಾ ನೋವು ನಾನು  ಮಾತ್ರ ಎದ್ದದ್ದು ಮಧ್ಯಾಹ್ನ  !!  . ಅದೇ ಕೊನೆ .ಈಗಲೂ  ಎಲ್ಲದಾರು ಕಟ್ಟಿಗೆ ತುಂಡು ಮಾಡುವವರು ಸಿಕ್ಕಿದಾಗ ಆ ನೆನಪು ಹಾಗೇ ಒಮ್ಮೆ ಕಣ್ಣ ಮುಂದೆ ಬಂದು ಹೋಗುತ್ತದೆ.  ತಂತ್ರ ಜ್ಞಾನ  ಮುಂದುವರಿದರೂ ಕೂಡ  ಮಾನವ ಶ್ರಮ ಇಂತಹ  ಕೆಲಸಗಳಿಗೆ ತೀರ ಅಗತ್ಯವಾಗಿದೆ .

.

ಬೆಳಿಗ್ಗೆ  ಕಾಫಿ ತಿಂಡಿ ,ಮಧ್ಯಾಹ್ನ  ಊಟ ,ಸಾಯಂಕಾಲ ಮತ್ತೆ ಕಾಫಿ ಅಥವಾ ಚಹಾ ಜೊತೆಗೆ ಸಂಬಳ . ಇದು ಕಟ್ಟಿಗೆ ಸೀಳುವ ಕಾರ್ಮಿಕನಿಗೆ ನೀಡುವ ಒಂದು ದಿನದ ಭತ್ಯೆ . ಕಟ್ಟಿಗೆಯನ್ನು ಬರೇ  ಕೊಡಲಿಯಿಂದ ಮಾತ್ರ ಭಾಗಮಾಡಲಾಗದು ಇದರ ಜೊತೆಗೆ ಕಬ್ಬಿಣದಿಂದ ತಯಾರಿಸಿದ ಗುನ್ನ  ಮತ್ತು ಚೆಮ್ಮಟಿಯನ್ನು ಬಳಸುತ್ತಾರೆ .ಇತ್ತೀಚಿಗೆ ಕಟೀಲು ಕ್ಷೇತ್ರಕ್ಕೆ ಹೋಗಿದ್ದಾಗ ಕಟ್ಟಿಗೆ ಸೀಳುವ  ಶ್ರಮಜೀವಿಯನ್ನು ನೋಡಿದೆ . ಕೆಲಸ ಯಾವುದಾದರೇನು? ನೆಮ್ಮದಿಯಿಂದ ,ನಿಷ್ಠೆ ಯಿಂದ  ಬದುಕಿದರಾಯಿತು ಅಲ್ವ ?

ನನ್ನನ್ನು ಫೆಸ್ ಬುಕ್ ನಲ್ಲಿ ಸಂಪರ್ಕಿಸಿ 
 https://www.facebook.com/thimmappa.vkkadaba